KISAH ANAK-ANAK SIDEK

Jame sekoloh rendoh, meme che kak wehi bbaloh dengan adik beradik. Terutama hok nombor 2. Lepas bbaloh gak, ayoh bedal dengan tali pingge askar hok warno hijau. Insaf meta. Lepas tu bbaloh pulok.

Tapi awas! Sapo2 hok buli dan kenak adik che kak, meme che kak akan timbuk tok kiro sapo. Sekalo gak, che kak hok mene. Kalu ado ore ngadu kato keno kenak ko che kak, meme ore tok cayo.

Sapo nok cayo gak, budok sakit jantung kuruh kering nok timbuk budok. Kahkahkah.

Pernah la sekali che kak tertengok baju adik. Ado ore curi baju adik. Che kak apo lagi. G gusti dio la jawabnyo. 

Adik bosu che kak minum air coca cola pun che kak triok sedih. Sebab maso tu, dimomokkan coca cola ni air Israel.

Ado satu peristiwo sampai ke loni che kak menyesal. Che kak bowok adik jate g round keliling kampung dengan basikal BMX. Tengoh laju turun bukit, kaki dio lekat celoh besi tayar basikal. Allah! Pucat llesi sero. Cepat2 che kak sekat ore mudo naik muto. Abe buleh ko tolong? Kaki adik kito lekat ni.

Mujur jugok jame ritu takdok ore jahat po loni. 

Keno cabut tayar dulu wei.  Mujurnyo tok cacat. Ma senyap jah. Bokali runsing takut kaki anok dio tok leh jjale. Tapi loni buleh jadi askar molek2 ado eh.

Maso adik nombor 4 baby lagi. Dio wehi triok. Ma g mandi. Sambil2 ngasuh dio, che kak baco kartun dalam suratkaba. Ado la perkataan celaka. Che kak pun royak celaka Ila. Aponyo ma pun wi napar sutir kat pipi. Bengong kelu meta sero. Eh saloh ko ambo royak gitu ko adik? Maso tu che kak darjah 2.

Maso sekoloh menengoh, che kak jare bbaloh sebab duk asrama. Balik sebulan sekali. Tok dei nok bbaloh.

Maso ngaji di UPM, che kak bermimpi. Adik beradik che kak lemas dalam laut. Che kak sedar. Che kak triok. Aloh la bakpo dengan adik2 pulok. Ruponyo ayoh dengan ma ccerai. Lepas 20 tahun bina rumahtangga, akhirnya jodoh mereka berdua takdok.

Che kak jare balik rumoh sebab sero sebok sokmo tengok adik2. Lebih2 lagi hok bosu. Che kak wat kerah hati jah. Wat manggok jah. Tapi bilo duk sore, air mato ni mudoh jatuh. Sebab tu che kak wat kijo mace2. Tok sir kelik duk dumoh.

Adik2 che kak dah ada kehidupan masing2. Che kak bukan kakok yang baik. Tapi jauh di sudut hati, che kak sayang sangat ko adik2. Walaupun berbeza perangai, kito lahir dari 1 ibu 1 bapa yang sama.